གྲོགས་པོའི་ནང་གི་གྲོགས་པོ།

ཚིག བེ་དུང་།
དབྱངས། རྨ་གླིང་ལྷུན་གྲུབ།
གཞས་པ། རྨ་གླིང་ལྷུན་འགྲུབ།

གྲོགས་པོ་ཟེར་ན་མི་སེམས་ཡོད་ནི་ཞིག།
དཀའ་སྡུག་དུས་སུ་མིག་གིས་རིག་ནི་ཞིག།
ཅི་ཞིག་མཛད་ཀྱང་གཡོ་སྒྱུ་མེད་ནི་ཞིག།
ཁ་ཞེ་གཉིས་ཀ་རྒྱུན་དུ་མཚུངས་ནི་ཞིག།
ང་ཡི་གྲོགས་པོའི་ནང་གི་གྲོགས་པོ་ཡིན།།

གྲོགས་པོ་ཟེར་ན་བརྩེ་བ་ཟབ་ནི་ཞིག།
སྐྱོ་བའི་དུས་སུ་སེམས་གསོ་བྱེད་ནི་ཞིག།
གོ་གནས་མེད་རུང་དཔུང་ཡ་ཉན་ནི་ཞིག།
རྒྱུ་ནོར་རིག་ན་ཧམ་སེམས་མེད་ནི་ཞིག།
ང་ཡི་གྲོགས་པོའི་ནང་གི་གྲོགས་པོ་ཡིན།།

གྲོགས་པོ་ཟེར་ན་མཐུན་སྒྲིལ་དམ་ནི་ཞིག།
ཕན་ཚུན་བར་ལ་ཕྲག་དོག་མེད་ནི་ཞིག།
ལེ་བདའ་བྱས་ཀྱང་བཟོད་སྒོམ་ཐུབ་ནི་ཞིག།
ཡོན་ཏན་མེད་རུང་མི་གཞི་ཡག་ནི་ཞིག།
ང་ཡི་གྲོགས་པོའི་ནང་གི་གྲོགས་པོ་ཡིན།།

གྲོགས་པོ་ཟེར་ན་མངོན་ལྐོག་མེད་ནི་ཞིག།
རྒྱལ་ཕམ་དུས་སུ་འགྱུར་ལྡོག་མེད་ནི་ཞིག།
མི་ཚོགས་ཁྲོད་ན་ཨ་གསར་མེད་ནི་ཞིག།
བརྩེ་བའི་གྲོགས་ལ་བསླུ་བྲིད་མེད་ནི་ཞིག།
ང་ཡི་གྲོགས་པོའི་ནང་གི་གྲོགས་པོ་ཡིན།།