ཌྰ་མ་རུ། (དཀྲོལ་བའི་རོལ་མོ)

           ཌྰ་མ་རུའི་རྒྱུ་དང་མཚན་ཉིད་སོགས་བཤད་པ་ལ།ལར་ཌྰ་མ་རུ་འདི་བླ་མེད་ཀྱི་རྒྱུད་སྡེ་རྣམས་མ་གཏོགས་གང་ཡིན་དུ་དཀྲོལ་པ་སོགས་མ་བཤད་ལ་རྒྱུད་སྡེ་འོག་མ་རྣམས་ལས་ནི་མི་འབྱུང་ངོ་།།རྒྱུ་ནི་སམ་བྷུ་ཊ་སོགས་ལས་འདི་ལྟར་ཏེ།རྒྱ་མཚོ་ཤིང་དང་སེང་ལྡེང་དང་།བཛྲ་ཤྲྰི་ཤའི་རྩ་བ་དང་།ཙནྡན་དམར་པོ་ལ་སོགས་པའི།།གང་ཉིད་ཡིད་ལ་འདོད་པ་བྱ།སོགས་གསུངས།འདི་ན་ཤིང་ཁོ་ན་ལས་གཞན་མ་གསུང་ཞིང་།བདེ་མཆོག་ལས་ནི།གཞན་པ་ཡེ་ནས་རྔ་ཆུང་ནི།ཐོད་པ་ལ་ནི་བསྐོར་བ་ཉིད།སོགས་དང་ཡང་།སྒྱུ་འཕྲུལ་དྲ་བ་ལས།སྤྲེའུའི་ལྤགས་པས་གཡོས་ན་ནི།ངོས་གཉིས་ལ་ནི་པདྨ་བྲི།།བུད་མེད་ཁྲག་གིས་མཛེས་པར་བྱ།།སྙིང་སོ་ཁྲེམ་ཁྲེམ་དག་བྲིས་ཏེ།ཞེས་གསུངས་པས་རྒྱུད་སྔ་མའི་དགོངས་པ་ལ་ནི་ཚད་ཀྱང་།དེ་ཉིད་ལས་འདི་ལྟ་སྟེ།།དགུ་བ་དང་ནི་བཅུ་གཅིག་པ།།ཁ་ལ་དེ་ཡི་ཕྱེད་ཉིད་དོ།།ཞེས་པའི་རབ་ལ་མཆུ་སོར་བཅུ་གཉིས་པ་དང་།ཁ་ལ་སོར་དྲུགའབྲིང་ལ་མཆུ་སོར་བཅུ་པ་དང་།ཁ་ལ་སོར་ལྔ་པ།ཐ་མ་མཆུ་སོར་དགུ་དང་ཁ་ལ་དེ་ཡི་ཕྱེད་ཉིད་དོགནང་གི་ངོས་སུ་རྩི་དམར་འཇམ་སོགས་ལེགས་པར་བཏང་ནས་གསེར་དངུལ་སོགས་རིན་པོ་ཆེའི་དཀྱིལ་འཁོར་རམ་སྐུ་གཟུགས་ཕྱག་མཚན་སོགས་བྲི་བར་གསུངས་སོ།།རྒྱུད་ཕྱི་མ་གཉིས་ཀྱི་དགོངས་པ་ལྟར་ན།སྐྱེས་པ་ལོ་བཅུ་དྲུག་ལོན་པ་དང་།།བུད་མེད་ལོ་བཅུ་གཉིས་ལོན་པའི་ཐོད་པ་ལྟག་སྤྲོད་བྱས་པ་སྤྲེའུའི་ལྤགས་པ་གཡོགས་པའི་ནང་ངོས་གཉིས་ལ།བུ་མོ་གཙང་མའི་ཟླ་མཚན་གྱིས་པད་མ་བྲིས་པའི་ལྟེ་བར་ཧྲི་མཾཿསོགས་བྲིས་ལ།སྐེད་དཀྲིས་དུར་ཁྲོད་ཀྱི་སྐྲ་ལ་བྱས་པ་མཐིང་རིལ་གྱི་རྐང་རུས་ཀྱིས་བརྡུང་བར་གསུངས་བ་སྟེ།ཡང་ཅང་ཏེའུ་དྲྭ་བ་ཅན་ཞེས་པའང་རབ་ཞིང་རྒྱུས་ཀྱི་སྟེང་འོག་བུག་པ་དག་ལས་ཕན་ཚུན་བསྣོལ་མར་དྲངས་ནས་བརྒྱུས་པའི་རེ་མིག་ཆོས་འབྱུར་ལྟ་བུ་སྟེང་དུ་བཅུ་དྲུག་དང་འོག་ཏུ་བཅུ་དྲུག་འབྱུང་སྟེ། ཡས་འབབས་མས་བརྟེན་གྱི་དགའ་བ་བཅུ་དྲུག་མཚོན་པའི་དོན་དུ་བཤད་དོ།  །དེ་ལྟ་བུའི་ཅང་ཏེའུ་མཚན་ཉིད་དང་ལྡན་པ་དག་ལ་ནི།དཀྲོལ་ཚུལ་སོགས་ཀྱང་ཞིབ་རྒྱས་གཞན་ལས་འབྱུང་མོད།འདིར་ཅི་ཙམ་དུ་ནི་ལག་གཡས་མཐེ་བོང་དང་མཛུབ་མོའི་ཌྰ་མ་རུའི་སྐེད་དཀྲིས་བསྣོལ་མཚམ་ནས་བཟུང་།ཐང་ལྷོད་མེད་པར་དཀྲོལ་བ་སྟེ།ཀོང་ལོ་གཞན་ཕན་རྡོ་རྗེ་སོགས་ཀྱི་ལ་བསྐྲད་པ་ལ་སོགས་པ་ལ་མཐེ་བོང་ཕྱིར་བསྟན་གྱིས་དཀྲོལ་ལ།  བྱིན་རླབས་དབང་བསྐུར་སོགས་ལ་མཛུབ་མོ་ནང་བསྟན་གྱིས་དཀྲོལ་བར་གསུང་ལ།དོན་དུ་གཡས་སྐོར་གཡོན་སྐོར་གྱི་ཁྱད་ལ་ལྟ་བུ་ཡོད་དོ།ཅང་ཏེའུ་དེ་ཡི་དེ་ཉིད།དེའི་ཁོག་པ་དང་ལྤགས་པ་རྒྱུད་བརྡུང་བྱེད་སྐྱེས་བུའི་ལག་པའི་རྩོལ་བ་སོགས་གཅིག་ལ་གཅིག་རྟེན་ཅིང་འབྲེལ་བར་འབྱུང་བ་ཆོས་ཐམས་ཅད་རྟེན་ཅིང་འབྲེལ་འབྱུང་དང་།སྒྲ་གྲགས་སྡོང་སྐྱེ་འགག་མེད་པ་ཆོས་ཉིད་སྐྱེ་འགག་སོགས་མཚོན་དོན་ནོ།
     དགོས་པ་ནི།བླ་མ་ཡི་དམ་སངས་རྒྱས་བྱང་སེམས་རྣམས་ལ་མཆོད་པ་དང་།མཁའ་འགྲོ་ཞིང་སྐྱོངས་དབང་དུ་བསྡུ་བ་དང་དམ་ཅན་ཆོས་སྐྱོངས་རྣམས་ཀྱི་རྒྱུད་བསྐུལ་བ་སོགས་སོ།  དེ་ལྟ་བུའི་ཌྰ་མ་རུ་བྱིན་བརླབས་པ་དང་ལག་ཏུ་ཐོགས་ལ།ཧྰུཾ་རྣལ་འབྱོར་མཆོག་གི་ཌྰ་མ་རུ།  །ཡུལ་ཉིད་མ་སྐྱེས་ཆོས་ཀྱི་བྱིངས།  །འཛིན་རྟོགས་བྲལ་བའི་ཡེ་ཤེས་ཀྱི།  །ཐེག་ཆེན་ཆོས་ཀྱི་སྒྲ་དབྱངས་སྒྲོགས།  །སོགས་ཀྱིས་དཀྲོལ་ཞིང་དེ་ཉིད་དྲན་པར་བྱ་བའོ།      །